ನಾಳಂಕೆ 5-12-1942 ಲ್ 105 ಸದಸ್ಯಂಗ ಕೂಡ್ನ ಸಭೆ (ದೇಶ ತಕ್ಕಂಗಡ ಪರ) ಮಾತಂಡ ಚಂಗಪ್ಪ ಅಯಿಂಗಡ ಅಧ್ಯಕ್ಷತೆಲ್ ವಿರಾಜಪೇಟೆ ತಾಲೂಕ್ ಪರಂಬುಲ್ ನಡಂದತ್. ಸಭೆಲ್ ತಕ್ಕ್ ಪರಂದವು 1) ಸಾಮಾಜಿಕ 2) ರಾಜಕೀಯ 3) ಆರ್ಥಿಕ 4) ಮಾನಸಿಕ 5) ಶಾರೀರಿಕ ಕಮಿಟಿ ಮಾಡುವಕ್ ಸಲಹೆ, ಕೊಡವ ಸ್ವಂತ ಬ್ಯಾಂಕ್, ಆಸ್ಪತ್ರೆ, ವಿದ್ಯಾಭಿವೃಧಿ ಮಾಡುವ ಕೇಂದ್ರ ಸ್ಥಾಪನೆ ಮಾಡೋಕ್ ಸಲಹೆ, ಪಿಂಞ ಸಮಾಜ ರಾಜಕೀಯ ರಹಿತವಾಯಿತ್ ಇರೊಂಡುಂದ್ ಸಲಹೆ ಮಾಡ್ ಚಿ.

ಅದಾನದು, ನಾಳಂಕೆ 20-06-1943 ಪಿಂಞ 3-10-1943 ಲ್ ನಡಂದ ಸಭೆ ಪರದಂಡ ಪೂವಯ್ಯ ಅಯಿಂಗಡ ಅಧ್ಯಕ್ಷತೆಲ್ ನಡಂದತ್. ನಾಳಂಕೆ 20-06-1943 ಲ್ ಅಧ್ಯಕ್ಷ ತಕ್ಕ್ ಪರಂದಿತ್ ಕೊಡವ ಜನಾಂಗ ಒಗ್ಗಟ್ಟ್ ಲ್ ಇರೊಂಡು, ಪುರ್ವತ್ ರ ಆಚಾರ ವಿಚಾರ, ಕಾನೂನು ಕಟ್ಟಳೆನ ಸಾಧ್ಯಆಪಚ್ಚಕ್ ಪಾಲನೆ ಮಾಡೊಂಡುಂದ್ ಎಣ್ಣ್ ಚಿ.

ನಾಳಂಕೆ 18-12-1943 ರಂದ್ 235 ಸದಸ್ಯಂಗ ಕೂಡ್ ನ ಸಭೆ ದೇಶ ತಕ್ಕ ಮಾತಂಡ ಚಂಗಪ್ಪ ಅಯಿಂಗಳ ಅಧ್ಯಕ್ಷಂಗಳಾಯಿತ್ ಆಯ್ಕೆ ಮಾಡ್ ಚಿ.
ನಾಳಂಕೆ 26-03-1961 ಲ್ ನಾಪೋಕ್ಲು ಲ್ ನಡಂದ ಸಭೆ ಪರದಂಡ ಅಪ್ಪಯ್ಯ ಅಯಿಂಗಡ ಅಧ್ಯಕ್ಷತೆಲ್ ನಡಂದತ್. ನಾಪೋಕ್ಲು ಲ್ ಪ್ರೈಮರಿ ಶಾಲಾ ಕಟ್ಟಡತ್ ನಡಂದ ಸಭೆ ಲ್ 500 ಜನ ಕೂಡ್ ನದಲ್ಲತೆ 40 ಪೊಮಕ್ಕ ಹಾಜರಿಂಜತ್. ಅಧ್ಯಕ್ಷ ತಕ್ಕ್ ಪರಂದಿತ್, ಇತರ ಕೋಮುಕಾರ ಕೊಡವಡ ಒಗ್ಗಟ್ಟ್ ನ ಪೊಳಿಪಕ್ ಪ್ರಯತ್ನ ಮಾಡಿಯಂಡ್ ಉಳ್ಳಾಂಗ್ ಎಚ್ಚರತ್ ಇರೊಂಡುಂದ್ ಎಣ್ಣ್ ಚಿ. ಸಭೆ ಲ್ ಬೈ ಲಾ ಮಾಡೋಕ್ ಕಮಿಟಿ ಮಾಡ್ ಚಿ. ಸಮಾಜ ಕ್ ಮೆಂಬರ್ ಆಪಯಿಂಗಕ್ ಶುಲ್ಕ ನಿಗಧಿ ಮಾಡ್ ಚಿ.
ಅಲ್ಲಿಂಜ, ನಾಳಂಕೆ 10-04-1966 ಲ್ ಪಾರಾಣೆಲ್ ನಡಂದ ಸಭೆ ಕೆತ್ತಣೆ ಎಲ್ಲಾ ಸಭೆ ಮಾತಂಡ ಚಂಗಪ್ಪ ಅಯಿಂಗಡ ಅಧ್ಯಕ್ಷತೆಲ್ ನಡಂದತ್.
ಪಾರಾಣೆಲ್ ಶಾಲಾ ಕಟ್ಟಡತ್ ನಡಂದ ಸಭೆ ಲ್ 800 ಜನ ಕೂಡ್ ನ ದಲ್ಲತೆ 44 ಪೊಮಕ್ಕ ಹಾಜರಿಂಜತ್. ಕೊಡವ ಜನಾಂಗ ತ್ ರ ಓಜ ಧ್ವಜಾರೋಹಣ ಮಾಡ್ ಚಿ. ಬೈಲಾ ಬಗ್ಗೆ ಚರ್ಚೆ ಮಾಡಿತ್ ಸರ್ವಾನು ಮತ ಮೂಲಕ ಅಂಗೀಕಾರ ಮಾಡ್ ಚಿ. ಆಡಳಿತ ಮಂಡಳಿ ಕ್ ಬೈಲಾ ಪ್ರಕಾರ ಚುನಾವಣೆ ನಡಂದತ್. ಮಾತಂಡ ಚೆಂಗಪ್ಪ ಅಯಿಂಗ ಚುನಾಯಿತ ಅಧ್ಯಕ್ಷ, ಪಟ್ಟಡ ಯಂ ಉತ್ತಪ್ಪ ಉಪಾಧ್ಯಕ್ಷ, ಪಾಲಂದಿರ ಸುಬ್ಬಯ್ಯ ಗೌ. ಕಾರ್ಯದರ್ಶಿ ಆಯಿತ್ ಆಯ್ಕೆ ಆಚಿ. ಕೊಡಗು ಪ್ರತ್ಯೇಕ ವಾಯ್ತ್ ‘ಸಿ’ ಪ್ರಾಂತ್ಯ ಆಂಡು ಎಣ್ಣುವ ಬೇಡಿಕೆ ಪ್ರಸ್ತಾಪ ಆಚಿ. ವಿರಾಜಪೇಟೆ ಮೀಸಲು ವಿಧಾನ ಸಭಾ ಕ್ಷೇತ್ರ ವಾಯ್ತ್ ಮಾಡ್ ನಾಂಗ್ ಅತೃಪ್ತಿ ವ್ಯಕ್ತ ಮಾಡ್ ಚಿ. ಇಡೀ ಕೊಡವು ಲ್ ಓರೇ ದಿವಸ ಕೈಲ್ ಪೊವುದ್ ನಮ್ಮೆ, ಓರೇ ದಿವಸ ಪುತ್ತರಿ ನಮ್ಮೆ ನಡ್ತೊಂಡು ಎಣ್ಣುವ ವಿಷಯ ಪ್ರಸ್ತಾಪ ಆಚಿ.

ಇಸವಿ 1942-1966 ಕೆತ್ತಣೆ ಅಖಿಲ ಕೊಡವ ಸಮಾಜ ತ್ ರ ಸೆಂಟ್ರಲ್ ಕಮಿಟಿ ಕ್ ಓರ್ ನಿಯಮಿತ ಅಧ್ಯಕ್ಷ ಇಂಜ್ ಲೆ.